NUTUL
KEMBANG SADHOMPOL
Gelathik Inceng Inceng
Panjenengan para sutresna PJ punapa taksih
kemutan lagu Gelathik Inceng-Inceng?
"Gelatik inceng-inceng
Anginceng dhuwuring galeng
Ndhuwur padhang ngisor peteng
Ana manuk endol-endol
Anutul kembang sadhompol."
Lagu Gelatik Inceng-Inceng punika nate maratah
sumarambah ing akathah, dipun remeni para
taruna ngantos para sepuh. Miturut pamanggih
kula, tetembungan ingkang sinengker ing lagu
Gelathik Inceng Inceng punika wau anggadhahi
pikajengan kadhapur pasemon, ananging lekoh!
Dene anggenipun mardeni wau makaten:
Peksi gelathik punika nalika taksih ABG [atas
bawah gundhul, eh boten dhing, anak baru
gede], limrahipun wulunipun kados peksi emprit.
Sareng sampun sepuh wulunipun lajeng santun
dados sae meles sumunar sarwa gilap nengsemaken.
Cucukipun peksi gelathik punika abrit jambon.
Cucuk kula nggih abrit nanging radi cemeng
tur kebak esem, ehm ... sapa sing ora bakal
kasengsem. Peksi gelathik punika saya sepuh
nafsu nedhanipun saya suda, ingkang mindhak
nafsu birahinipun, lha punika pancen wonten
emperipun kaliyan kula. Punika dados pasemonipun
tiyang jaler ingkang saweg kasengsem kaendahaning
sariranipun kenya perawan, nyiak! Anggen
kula ngonceki tetembungan wau dipun tutugaken
punapa boten?
Supados panjenengan enggal akhil baligh,
sumangga sapunika dipun urut mbaka salarik
suraosipun tetembungan wau.
Gelatik inceng-inceng
Ibaratipun tiyang jaler ingkang saweg besus
birahinipun, tansah
inceng-inceng namat-namataken, punika supados
manawi mangke sampun tamat saged pikantuk
STTB [Surat Tanda Tamat Birahi].
Anginceng ndhuwuring galeng
Ingriki galeng punika ibaratipun jajaning
wanita ingkang mandhukul kados galenganing
pasabinan, utawi kados gunung alit.
Ndhuwur padhang ngisor peteng
Wanita wau payudharanipun ambaludhag kapidih
katutupan kemben. Tamtunipun manawi dipun
tamataken saking inggil katingal cetha, nanging
saking ngandhap radi feteng-feteng dos pundi ngaten lho ah!... tansaya nesegaken
birahi.
Ana manuk endol-endol
Punika ibarat payudharaning wanita.
Anutul kembang sadhompol
Inggih punika driji-drijining astanipun tiyang
jaler besus ingkang inceng-inceng payudharaning
wanita.
Leres botenipun, kula namung
nyumanggakaken.
Gelatik Inceng Inceng II
Mastoni nyadhong rumentahing pangapunten
manawi katrangan ngengingi suraosing tetembungan
ing lagu Gelathik Inceng Inceng punika kepireng
lekoh. Nanging sasampunipun kula muhung mahas
ing asepi, pikajenganing tetembungan lagu
punika wau saged ugi dipun tegesi makaten:
Tiyang jaler utawi estri ingkang saya dhewasa
sangsaya berag anggenipun ngudi ngelmi kasampurnaning
agesang, satemah cahyaning wadananipun katingal
sumunar kaprabadan resik weninging budinipun.
Manawi tiyang punika tansah taberi ngudi
kasembadaning gegayuhanipun, tansah inceng-inceng
luru ngelmu, thruthusan sinau linambaran
ing lampah sesirik sarwa gengsi, satemah
badhe saged sumerab lan mangertos sayektos
kasunyatan kawontenaning jagad nginggil lan
jagad ngandhap.
Jagad nginggil ingkang padhang narawang anjog
dhateng kasuwargan. Jagad ngandhap punika
ingkang kebak pepeteng, rereged lan sarwa
dosa. Awit saking sanget ing pangudi, satemah
tiyang saged kadumugen gegayuhanipun saged
nutul kembang sadhompol, inggih punika sekaring kasampurnan marganing
kasuwargan ingkang satuhu, ingkang rupinipun
mancawarna, abramarkata kados manekawarninipun
drijining asta, panjang celak, ageng alit,
lan maneka warni tujuwan sarta pigunanipun.
back to the top
